"CV" مواطن غير صالح!

date 2016/11/17 views 1 comments 0
author-picture

icon-writer عمار يزلي

أنا هو بوزوار! وبوزوار لا يعترف بأحد! القانون عنده "كللي ماكانش"! لا قانون! القانون عندي معناه "الفوضى"! كيف يطبق علي القانون وقد خلقت حرا؟ والقانون يقيّد حريتي، لهذا فأنا لا أعترف لا "بسطوب" ولا "بالفيروج الأحمر": أنا نفوت نزرنف "غير هااك" كما يقول لي رأسي!حتى الشرطي لا استعرف به! "يدير بروصي أو حتى عشرة.. يدير عشرة ويقرث، يدير "الروتري أو ما يديرش. نسوق .نسوق! وما نسوقش "بالتي"!..نسوق نووورمال! ما نديرش السنتورة.. جامي! نحس روحي راني محبوس"بورطان" عمري ما دخلت للحبس.! ندوبلي آقوش آدروات.. في الأنترسكسيون، في الرامبوان نقطع الطريق بلا كلينيوطا.. ندوبلي الكار، الكاميو،السيمي الطرام! ندير اللي بغيت.؟راني في بلادي!.. وإذ بغا شي واحد يديلي الكواغط غير يديهم! عندي اللي يردهم لي! ودابور أنا نسوق بل بيريمي..ما عنديش البريمي! عمري ما درته لا بالدراهم لا بالتفوات نتاع الصح! ماعنديش لاصورانش وحتى لا كارط غريز ما عنديش! اللوطو مطرافيكيا..أنا ماعنديش لا كارط..عمري مادرتها..ما تفوطيش وما نخدمش وما قريتش! ما عندي ما ندير بالإدارة وبلكلوغط..! حتى الطبيب! ما نمرضش!. كي نمرض نداوي بالدوا نتاع أمي! عندها قفة دوا... فرماصيان في الدار..اللي بغيته كاين..من دوا الكحة والعطيس ولاليرجي حتى دوا السل والسرطان ولطاسيون والسكر والقلب وحتى أمراض العقل والرأس! الزطلة ما نزطلش.! الشراب ربي تاب علي.. كنت نشرب لاركول سيك مع جماعة من المنحرفين! أنا مش منحرف! أنا "شبه منحرف"! كل أصحاب الحومة يخافوا مني.. عندي سيف قد "هاااك" في الدار لكن عمري ما استعملته! بصح الكل يعرفني بللي عندي "الطويلة".. و"بوكليي".. وماصك! البوكلييه، قصعة نتاع بارابول "موديفي" حتى ولات "بوكليي"! أنا عمري ما فكرت في الحرقة! علاش نحرق! أهنا نقعد وهنا "نحقر".. بصح ما نحرقش! لا بناوات لا طرولي لا كار.. بصح نركب باطل!! طاق على من طاق! وهكذك.. وعمري ما ضربت واحد أو دخلته للصبيطار! أنا دخلت للصبيطار عام ونص، عاودولي كلش بالحديد! الرجلين، اليدين، قاع عندي فيهم بروش بروش! ودخلت للسبيطار مش دبزة أو غلبوني! أنا واحد ما يغلبني ما يقدر علي غير اللي خلقني! أنا رئيس الحكومة نتاع الحومة! اللي صرالي هو أني طحت بلوطو فوق قنطرة على "كليو بونية" و"جيطا": تكرفوسو الكل، وفيهم 3 موتي و4 مجاريح وأنا كنت مع صاحبي هو مات وأنا زاديت! القط عنده سبعة أرواح! أنا مش قط..أنا مواطن صالح! ندير الخير كي يجي واحد يطلب مني نعاونه في خوه..نعاونه! نمشيوا نديروا فيه التير.."ما عرفنا حد"!الله غالب أنا جيت داير هكذا..من عندهم.. من عند الحكومة..في الحومة!

  • print