وداوني بالتي كانت هي الداء

date 2016/11/17 views 119 comments 0
author-picture

icon-writer عمار يزلي

قلت للخضار الذي كان يبيع البطاطا وغيرها من الخضر بسعر النار في النهار القهار: علاش هذا الغلاء علاش؟! قال لي: هااا النو! المطر بزااف! قلت له: والله ما فهمنا! أنتم تحصلوا الغلاء في المطر، والموالون يحصلوا غلاء اللحوم في النو كذلك! لميار يحصلوا مشكل المرور في "الشتا"! علاه أننم أعداء المطر؟ ربي خلقنا غير للجفاف؟ ما كانش رحمة ربي معكم؟ حتى مع الدوا نتاع السكر؟ حتى مع الصيادلة المضربين هذه شحال من شهر! لم يفهم كل هذا الكلام، رغم أنه فهم كل شيء.. وراح يبرح ويوزن ولا يبالي بي: الرخا يخلع.. كول آلمسكين.. البطاطا "بدي ميل" الطماطم بـ "ديزوي ميل" اللوبيا الخضراء  "بطرانت ميل"!! كول آالمسكين.. عيش يا القلّيل!

تركته وقلت له في نفسي: القلّيل عندكم صار هو الغني! والفقر لم يعد أحد يسمع به! كلاه بوبي! ورحت أبحث عن خضار "رخيس"! قلت له: بشحال البطاطا: قال لي: "ناف ميل! الطماطم بكانز ميل"...أنا هو الرخيس فيهم! قلت له: الرخيس فيكم هو هذاك اللى راح يبرح على طول جهده ويبيع البطاطا بدي ميل.. وكي ديارة!  قلت له: أوزن لي حبة بطاطا وتكون مليحة فيها شوية بروتينات! ورحت أختار! قال لي: ما تختارش خويا! وما نوزنش بالحبة.. علاه حلوة؟.. قاطو! باتيسري! قلت له: "صحة أعطيني حبة ونص!" تنرفز وصرخ: ما نبيعش بالحبة آآصاحبي خليني نخدم على راسي! قلت له: "أخدم حتى على كرشك! حبة ونص راني نقول لك.. مش حبة! بصح أعطيني هذه اللي راها شابة ومامضروباش بالفاس!." ولكثرة لجاجتي..قال لي: هاك ديها باطل.. الله يسهل غير خليني نسقّد لكليان نتاوعي! أعطاني حبة بطاطا.. قد هاااك! نيبلية مش بطاطا! حبة حلوة! كوجاك! تركته ورحت للأخر: هاك أوزن لي حبة طماطش هذه..! قال لي: ما نبيعش بالديطاي! قلت له: بشحال تبيع بالقرو". بالجملة يعني؟ قال لي: 15 ألف للكيلو.. وهذه من هنا بعشرين ألف..جديدة..! قلت له: "أعطيني رطل من هذا الرخس!" وزن لي 3 حبات وقال لي: هذا ما يخصك؟ قلت له: يخصني كلش..بصح الله غالب: قال لي: جاتك 7 ألاف! قلت له: هاك كاشيلي في هذا الورقة نتاع الكازوران! قال لي وهو يفتح فمه: نتاعاش؟ واش من كازوران؟ أنا خاطيني! قلت له: راني شريت شحال من حاجة ويخص لاصورانس تردلي! عندي "صان بورصان"! هذا مش دوا؟ هاك كارت الشفاء!

نظر إلي وقال لي وهو يتركني ليزن لأخر: كارت الشفا.. آآآالحاج... الله يجيب الشفا! قاع راهنا باغيين نهبلوا مش غير أنت!

  • print