بوقالات18

خالد مشيت في طريق الليسي ورجعت خايب وزعفان، قالولي الناس ما قريتش بزاف رديت وقلت... بصح راني نحس روحي عيان، اليوم بعدما كانوا يسموني في وسط الفاميليا تلميذ فنيان، وليت في زماني أستاذ وملك راي وأكبر فنان،.. أنا هو خالد سيرتي على كل لسان، وبلا بيا وهران راحت خسارة‮ ‬بصح‮ ‬فني‮ ‬راهو‮ ‬مغلّط‮ ‬شحال‮ ‬من‮ ‬إنسان‮ ‬وإنسان‮!‬

كريم‮ ‬مصباحي
يا نجوم الليل الضواية اطفي وما تخافي، سوادك يظلم جميع الناس بصح أنا عندي مصباحي، غنايا على السُكنة المفقودة والخدمة ما نهدرش راكي تعرفي، عندو الحق اللي قال النحس يتبّع مولاه بصح أنا درت الدراهم من مشاكل الناس... وربي إن شاء الله من عينهم يحمينا ويعافي!

الشاب‮ ‬بلال
الهدرة قليلة والنميمة فيا بلا فايدة، أنا هو أستاذ التمنشير والتقطاع وغيري نارو قايدة، ناكل مع الناس في الخير بصح في أغنية وحدة نقلب عليهم المايدة، بلال حبة قليلة في السوق، وعدياني ايلا حلفت فيهم ما تنوضلهم نايضة!

بعزيز
يا الفال الزين شوف حالتي كيفاه ولات، مرة حبيب السيستام ومرة عدوّ الجنرالات، ما عرفت يا زهري إذا فيا دعوة الوالدين ولا كاين من غير هاذي الحاجة حاجات، فهموني بالله عليكم، أنا معاهم ولا ضدهم.. ياخي مولا دعوتي دارها بيا ومات!