فريدة صابونجي
طلبت من ربي ثلاث أمور نروحلها ولا عندي تجي، الصيام والصلاة ويقولو يا فريدة روحي حجي، رديت بيني وبين روحي.. (بوه عليا بوه) أمالا نحبّس الفن ومن بعد شكون عليا يفاجي، أنا فنانة كبيرة وعمري ما كنت راقدة ونمونجي.. سمعت صوت بعيد ينصحني ويقول (ما تطمعيش في ليام لخرين يا صابونجي)!
محمد عجايمي
لو كان السعد ينشرى بالمال نشريه ونخبيه ليّامي، ولو كان الهدرة الزايدة ينحّوها بالكتبة نروح نحوّس على كتاتبي يرسخ كلامي، بذرتي كبرت وتسوست واللي يشوفها تسوّس معاها تاني، إن شاء الله برك الناس تتفكر بعدما تيبس البذرة في ترابها واحد اسمه محمد عجايمي! ...
لخضر بوخرص
بقيت حذا العمارة نحسب في العديان، قالوا الحاج لخضر بعد الجزء الأول ما يعود يبان، بصح رجعت يا عدياني منتج ومخرج ومؤلف وممثل ولخرين قاع بلا بيا ما كان... يسموني بوخرص بصح شكون هذا اللي يحبّسني على الكلام!
...
صوريا بوعمامة
جنية خرجت من قاع البحر وقالت.. اسمك ثقيل ما هو خفيف، ولمتك كبيرة وبالترنديف، بصح كل وزير يجي لعندك خصّوا تعريف، خبريه علينا وعلى الزوالية يا صوريا.. يا بنت الريف!
...
بيونة
جزت على جنية، قالت لي شكون انتيا، رديت وقلت أنا بيونة الولية، قالت (بوه عليا حسبتك شرطية ولا واحدة من الجدارمية.. على واش راكي تحوسي يا الولية)، قلت لها ماني نحوّس لا على مال ولا على جاه، حقروني وغيبوني، نحوس برك واش ضيّعت يولي ليا.
...
كريم بوسالم
الطبق بين عينيا ونحلم بالخاتم بين صباعتيا، والغريب اللي راح زمان يرجع ليا... والله ما نخلّي بلاصتي في النشرة حتى يتغمضو عينيا..
...
حمراوي حبيب شوقي
غلقت بابي في ساحة الشهداء دفة على دفة، ولميت فراشي لفة على لفة، أنا عندي ليتيمة شمعة ضوّاية عمرها ما تطفى، وأنا وحبابي فيها نعيشوا حتى لعمار تفنى واللي كرهنا يا ربي منشارو يحفى..
...
مولود حمروش
رحت لجنان (الميثاق) وغرست وردة (الإصلاحات) مسكية، واش نبعثلك في هذا الزمان خوخة ولا رمانة، طال غيابك سنين وسنين وكنت حاسب بلي راح تغيب سمانة.. بصح مهما طالت الأيام والله ما ننساك يا مول الخانة!
...
لويزة حنون:
عسل يا عسل في باقة حنون خضرا، يا شميمت العاشقين يا لويزا يا قمرا، سيد الملاح حلف بالنجاح كون جا عندو منك عشرا، وقال بلي ما يرأس الحكومة غير إذا جات غزالته باش تكمل الحضرة...
...
رشيد حراوبية
في الساقية الماء يجري والحشيش نابت متخالف، الجامعة ضاعت وسط الفُرقة والراي التالف، كي غبت وغاب زهري مرضت، وعاد اللي يخرج من عندي بالشهادة خايف.
...
