حكومة “أنقاض” وطن!

أمام ما يحدث في الداخل من فساد وتبذير وشحّ في الأموال وفحش في الأعمال، وما يحوم حول حمانا من تربّصات “طويلة المدى قوية الأذى”، وتغوّل لأقلية ساحقة خرجت من رحم الأزمة قوية ماليا (ونيجيريا) بعد أن قويت سياسيا، إثر ضعفها اجتماعيا وشعبيا، وجدت نفسي صرت مسؤولا كبيرا في الدولة في عز وانخفاض قيمة العملة وعملية قيمة الانخفاض (في الموارد الموالية بسبب سعر النفط المتدني بفعل الفاعلين المفعول بهم أمريكيا، وهم عرب مسلمون)

 ووجدت نفسي أجمع الحكومة في اجتماع عاجل لمجلس الوز.. قلت للبط: اسمعوا يا.. بطّي: كان النفط غاليا، فتفرشكنا وتفرشكتم، لكن اليوم الرخس وصل إلى عقر الدار، وما بقي في الخزانة إلا الفار يلعب بوثائق الدار، نحن بحاجة إلى استرجاع ديوننا عند الآخرين. قال لي وزير الخارج: نطلب من موريطانيا ترد ديونها لنا. قلت له: مليح.. زكارة فيها، شحال رانا نسالو لها؟ قال لي: 350 ألف سنتيم! قلت له:.. من غدوة، وهذاك نتاع مصر. شحال رانا نسالوله؟ قالي لي: “صانصيكانت ميل سنتيم“. قلت له:.. خير من مكانش.

وبدأت أحسب الديون بالدورو وبالعشرين دورو، وأفتش في جيوبي: وأنتم إذا عندكم شي صرف أعطوه لنا باش نفليكسيوه للشعب. قال لي وز.. المالية: وجماعتنا؟.. قلت له: خلصوهم واش راكم تنتظروا؟ أنا عندي “كمشة نحل خير من شواري ذبان“.. الشعب ما عليهش، بصح نتاوعنا نتاع السلطة نتاع الدولة نتاع الشعب نتاعنا، ما يخصناش نفرطوا فيهم! نطق وز.. الدين: سيدي، أحنا راه فينا الدين بزاف والأئمة يمكن يديروا “قريف” وما يزيدوش يصليوْ ولا يصوموا ولا يتوضاو.. ورمضان راه جاي. قلت له: بلع فمك أنت. أنت وزير الدين، أنت اللي يخصك تعطينا باش نخلصو الديون، اجمعوا من عند الشعب كل جمعة، وجيبونا الدراهم، الشعب راه كبر ودار الشلاغم، نبقاو غير أحنا نوكلوا فيه؟ النفط بح.. كلاه بوبي،. قلت له: يخلي دار أمك، واقيلا راك طوجور خابط؟ بوبي هو قضايا الطريق السيار والخليفة والبنوك وسوناطراك ولابوصت، وصندوق الزكاة، والثقافة.. وأكمل واحد من البط ما قاله الوز..: والسلاح؟ قلت له: بلع مردومك، السلاح نشروه.. وباش تدافع على بلادك يا وحد المشرّك الفم؟ كي يدخلوا عليك الحوثيين هاذوك نتاع الجنوب، وإلا الموصل وإلا الرمادي نتاع الفلوجة نتاع جسر الشغور نتاع الكيف نتاع المغرب! وموريطانيا نتاعنا.. والبوليزاريو هدوك نتاع الصحراء نتاع المغرب! (رفع هنا وزير الخارجية صوته عاليا: الصحراء الغربية! ليصحح لي فلتة اللسان!) قلت له: الصحراء الغربية نعم؟ علاه أنا واش قلت؟.. جزائرية؟

وأفيق مهلوسا كمن شرب الإكستا!