كورونا في رمضان؟

رمضان لهذه السنة، سيكون حتما محتلفا عما سبق، بناء على قانون “التقاعد الإلزامي في البيت” فلا هو وقت عمل مفترض، ولا وقت راحة بل وضع غير مرضي لانه ..مرض، لهذا قررت أن أصومه كيفما اتفق..وبناء على المستجدات التي لا أتمنى أن نستجي بقاءها أطول.

مشكلتي أني أنسى! ومشكلتي في كثرة مهني! أنا متعدد المهن، وكما يقال: ألف حرفة وألف ميزيرية!: قزادري، إلكتريسيان، ديباناج أوطو، بستاني، ماصو، بريكولاج جنرال! في كل ما هب ودب! أعدل التلفيزيونات والراديوهات..نتاع بكري طبعا! حلاق، أنا من كان يحلق شعر أبنائه الخمسة منذ كانوا صغارا! حتى بنتي الكبيرة عندما كانت صغيرة أنا حسنت لها شعرها عندما “دار فيها القمل” يوما في لا كريش! حسنت لها شعرها كالبو..! ولات تحسبها زيدان! ولينا نسموها كوجاك! (كي تتفكرها اليوم تبكي وكي نتفكرها أنا نضحك!):

قررت هذا العام في رمضان أن أشتغل ولا أنام، لكن ضمن الحي خوفا من بقاء العزل والحظر لمدة أطول، لكن في الحي لا مشكل..يعرفونني.. لهذا رحت أوزع رقم هاتفي على كل من قد يحتاجني في عمل عاجل أو آجل، ليل نهار: فويت نتاع الماء أو القاز! بالوعة، مجرة مبوشية، روقاع مطرطق، تيو مبوشي، ضو صوطا، ماس في الكابل، تلفون خاسر، قصعة تشد غير الجزائر وما تشدتش كنال بليس، حتى البورطابل وليت نعرف نحله ونخرب فيه! بصح ما تحصي واش يولي يقول: غير يهدر وما يحبش، أو تسمع وما تهدرش، أو يفيبري وما يصونيش! المهم كي نحله ما يعاودش يولي كما كان! لكن خير من والو، خير ما يكون ما يهدر وما يصوني ما يشطح!

أول كوماند، جاءتني قبيل أول يوم من رمضان بأسبوع: قال لي صاحب المكالمة وهو جار، اتصل وقال: أجيني غدوة صباح! راه عندي الطواليت مبوشية! قلت له: ما تديروا والو فيها حتى نجي! قال لي: واش عندنا ما نزيدوا نديروا فيها، راهم ديجا داروا فيها الناس وكملوا! راها تقرّعت! الزبل راه وصل حتى بيت الرقاد! راه طلع زبلها فوق ماها! رانا بايتين عند الجوارين! قلت له: ما تديروا والو عند جوارينكم! وحضيوا روحكم من كروونا. خير ما نعاود نولي نهار آخر عند جوارينكم حتى هما! الفيسي والفيورس.. هيا غدوة! تبقاو على خيرة  آآه..على خخخخخير..!

ويوم الغد كان اليوم الأول من رمضان! ونسيت ولم أذهب وتعالى تشوف ما حدث للرجل!